Tuesday, September 18, 2012

மாற்றுத் திறன்


இருவருக்கு எதிரில்

தலை குனிந்து
அமர்ந்திருக்கிறான்

மனைவி கோவிலில்
மெய்மறந்திருந்தாள்

அவனுக்குப் பேசும் திறமை
குறைவாக இருக்கிறது

பூங்காவில் மகள்
ஊஞ்சலாடுகிறாள்

வாடிக்கையாளர்களிடம்
தன் நிறுவனத்தின்
அருமை பெருமைகளைப்
பேசக் கூசுகிறான்

சதுரங்கக் காய்களுடன்
காத்திருக்கிறான் நண்பன்

நிறைவேற்றும் சாத்தியங்களற்ற
பொய்களைச் சொல்ல இயலுவதில்லை

இவன் காதலை நிராகரித்தவள்
மீண்டும் வந்திருக்கிறாள்
மகப்பேறுக்காக

வெளியூர் மேலதிகாரியின்
காதல் தோல்விகளை
சாயங்கால வேளைகளில்
அவருடன் குடித்துக் கொண்டே
கேட்டிருக்கலாம்.

வேலைக்காரச் சிறுமியை வருடும்
பணக்கார விரல்களை
அடுத்த முறை கண்டால்
வெட்டிவிட வேண்டும்

கழுத்தைப் பிடித்துத் தள்ளுவதிலும்
நேர்மை தவறாத நிர்வாகம்
வெளியேறும் நேர்முகத்தில்
உற்பத்தித் திறன் குறைவு
என்று மட்டும் குறிப்பிட்டது
இடப்பற்றாக் குறையால்?

இப்படிப்பட்ட இரவில்
பூங்காவில் மணியடித்து
கோயிலில் ஊஞ்சலாடி
மகப்பேறுக் காதலியுடன்
சதுரங்கம் விளையாடியதில்
உற்பத்தித் திறன் உயர்ந்ததாக
அந்தச் சிறுமி சொல்லிய போது
தனது பிரத்யேக வனத்துள்
மெல்ல மெல்ல பிரவேசித்தான்


[நவீன விருட்சத்தில் பிரசுரமாகியது]

4 comments:

திண்டுக்கல் தனபாலன் said...

வித்தியாசமாக இருந்தது...

உயிரோடை said...

சத்தியமா புரியல அண்ணா

திண்டுக்கல் தனபாலன் said...

உங்களின் தளம் வலைச்சரத்தில் அறிமுகப்படுத்தி உள்ளது... வாழ்த்துக்கள்...

மேலும் விவரங்களுக்கு இங்கே (http://blogintamil.blogspot.in/2012/09/blog-post_29.html) சென்று பார்க்கவும்...

நன்றி…

மாற்றுப்பார்வை said...

நல்ல பயனுள்ள பதிவு