பாமரோமேனியன்

உன்னதமாய் வாழ்ந்து
அகாலமாய் வீழ்ந்தவன் நான்
துரோகத்தின் வலி இன்னமும் மீதமுள்ளது
எனக்குப்பின் பிறந்தவன் தேவனாகி விட்டான்
முன்பைவிட வேகமான கால்களும்
நீண்ட நாவும் வலுவான பற்களும்
கூர்மையான நாசியும் என்னிடம் இப்போது
முதுகைப் பற்றி ....பிறகு சொல்கிறேன்
இப்போதெல்லாம்
சில வருடங்களிலேயே இறந்து விடுகிறேன்
உடனே பக்கத்துத் தெருவிலோ ஊரிலோ
பிறந்தும் விடுகிறேன்
கொலைகாரர்களையும் கத்தியையும்
கண்டால் உன்மத்தம் ஏறுகிறது
அவர்களை எளிதில்
என்னால் அடைய முடியும்
ஆயினும் சிலர் முதுகில் தடவும்போது
பயமாகத்தான் உள்ளது
என் வரலாறு அப்படி;
பெயர் சொல்லவே
அஞ்சுவர் முன்பெல்லாம்;
இப்போது கூப்பிடுவது என் புது எஜமானன்
நான் தாவியோடிச் சென்றடைய
பூரிப்புடன் சொல்கிறான்
'சீசர் ரொம்ப சூட்டிகை'
வாலை மெல்ல ஆட்டத் துவங்கினேன்