உச்சத்தின் அருகில்

முன்னூறு கண்கள்
உற்றுப் பார்த்தாலும்
சட்டை செய்யாத இயந்திரம்
பத்தாயிரம் அடி உயரத்தில்
மிதக்கிறது முன்னும் பின்னும்
அலட்சியப் புன்னகையுடன்;
குதிகாலில் குறுக்கிட்ட
குழந்தையின் பார்பியால்
தடுமாறி விழுபவளைத்
தாங்கிப் பிடிப்பவன்
கண்களிலிருந்தும்
அதரங்களிளிருந்தும்
சில பூக்கள் அவளைச்
சூழ்ந்த நேரத்தில்
மீண்டும் பெண்ணானவளின்
கன்னங்களின் சிவப்புக்கு
அவள் செலவழித்த நேரங்கள்
பலருக்குப் புரிகிறது இப்போது;
வேறு தளத்திற்கு நகர்ந்திருந்த
கவிதை ஒருவனுக்கு;
கேட்கும் ராகத்தின்
புது இழைகள் ஒருத்திக்கு;
எல்லாமே உச்சத்தின் அருகில்
சில மணித்துளிகளே ஆயினும்

(நவீன விருட்சம் மின்னிதழில் பிரசுரம் ஆகியது.)