Saturday, December 14, 2013

weed ஏகுதல்



weed ஏகுதல் 

கடற்கரை மணலில் 
கால்கள் புதைகையில் 
வாயிலிருந்த weed என்னை 
வானுக்கு அனுப்புகிறது 

பிடித்த தோழியை 
பிடிக்காத சக அலுவலன் 
திருமணம் செய்வதின் 
சோகம் கரைகிறது 

அருகிலும் தொலைவிலும் 
ஒரே சமயத்தில் 
கன்னங் குழைய சிரிக்கிறாள்

பைக் ஒட்டுகையில் நிலம் 
படுக்கத் தெரியாமல் 
பேலன்ஸ் தவறி 
சிதறுகிறது 

ஸ்லோ மோஷனில் 
சக்கர ஆரங்கள் 
லிப்ஸ்டிக் பூசிக்கொள்கின்றன 

எனக்கு வலிக்கிறதா 
என்னும் குரல்  
செவ்வாயிலிருந்து கேட்கிறது  

ஹோட்டல் கலிபோர்னியாவின் 
4.19 லிருந்து நானே கிடாரானேன் 

கவுரவக் கண்றாவிக்காகக் 
குழந்தையைக் கொன்றவர்களுக்குத் 
தண்டனை அவசியம் 

விவிலியமும் குரானும் 
தீர்ப்பில் ஓதிய நீதிபதியை
நான் கைது செய்கிறேன் 

தூரத்து நீர்ப்பரப்பில் 
தத்தளிக்கின்றன 
நெமோ அளவு கூட 
கடலறியா கப்பல்கள் 

இமைகளை மூட 
அஞ்சுவதால் 
கண்திறந்தே தூங்குகிறேன்  

இந்தப் பொன்னான 
பதினைந்து நிமிடங்கள் 
இப்படியே இருக்கின்றன 
பன்னிரண்டு மணிநேரங்களாக  

இதுவே இப்படியென்றால் 
அரவத்தின் முத்தம் 
எப்படி இருக்கும்

ஊர் திரும்பியதும் 
காம்ப்ளான் கமழக்
கட்டிப் பிடித்தவன் 
சொர்கத்தையும் 
நரகத்தையும் 
ஒரு சேரக் காண்பித்தான்